ଚର୍ଚ୍ଚାରେ ମୋଦୀଙ୍କ 2700 କୋଟିର ରାଜମହଲ !

ସରଗରମ ହୋଇଛି ଦିଲ୍ଲୀ ରାଜନୀତି । ଆପ ଓ ବିଜେପି ଭିତରେ ଆରମ୍ଭ ହୋଇଯାଇଛି ବାକ୍ ଯୁଦ୍ଧ । ଏମିତିକି ରାଜନୀତି ଯୁଦ୍ଧରେ ଜିତିବା ପାଇଁ ସବୁ ପ୍ରକାରର ଚେଷ୍ଟା ଚଳାଇଛନ୍ତି ରାଜନୈତିକ ଦଳ ।
ବାସ୍ତବରେ ଦିଲ୍ଲୀରେ ନିର୍ବାଚନ ତାରିଖ ଘୋଷଣା ହେବାର ପରେ ପରେ ଆମ୍‌ ଆଦ୍‌ମୀ ପାର୍ଟୀର ବଡ଼ ନେତାମାନେ ଖବରଦାତା ସମ୍ମିଳନୀ କରି କେନ୍ଦ୍ର ସରକାର ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି । ଦିଲ୍ଲୀରେ ପ୍ରଧାନମନ୍ତ୍ରୀଙ୍କର ୨୭୦୦ କୋଟିର ଏକ ରାଜମହଲ ଅଛି ବୋଲି ରାଜ୍ୟ ସଭା ଏମ୍‌ପି ସଞ୍ଜୟ ସିଂ କହିଛନ୍ତି। ଏହାଛଡ଼ା ଭାଜପା ନେତୃତ୍ୱାଧୀନ କେନ୍ଦ୍ର ସରକାର ତାଙ୍କଠାରୁ ମୁଖ୍ୟମନ୍ତ୍ରୀ ଆବାସ ଛଡ଼ାଇ ନେଇଥିବା ଆତିଶୀ ଅଭିଯୋଗ କରିଛନ୍ତି। ତେବେ ଦିଲ୍ଲୀରେ ଫେବୃୟାରୀ ୫ରେ ଭୋଟିଂ ହେବ। ଫେବୃୟାରୀ ୮ରେ ନିର୍ବାଚନର ଫଳାଫଳ ଆସିବ। ଏମ୍‌ପି ସଞ୍ଜୟ ସିଂ କହିଛନ୍ତି, ମୁଖ୍ୟମନ୍ତ୍ରୀ ଆବାସର ବଣ୍ଟନ ୩ ମାସରେ ୨ ଥର ରଦ୍ଦ କରିଦିଆଯାଇଛି। ଏହାକୁ ନେଇ ଭାଜପା ଏବଂ ଏହାର ନେତା ଅପପ୍ରଚାର କରୁଛନ୍ତି। ଦିଲ୍ଲୀରେ ପ୍ରଧାନମନ୍ତ୍ରୀଙ୍କର ୨୭୦୦ କୋଟିର ରାଜମହଲ ଅଛି। ସେ ଦିନରେ ତିନି ତିନି ଥର ପୋଷାକ ବଦଳାଉଛନ୍ତି। ୧୦ ଲକ୍ଷ ଟଙ୍କାର କଲମ ବ୍ୟବହାର କରୁଛନ୍ତି, ତାଙ୍କ ପାଖରେ ୫୦୦୦ ସୁଟ୍‌ ଅଛି ଏବଂ ୬୭୦୦ ହଳ ଜୋତା ଅଛି। ସେହି ରାଜମହଲରେ ୨୦୦ କୋଟିର ଝୁମର୍‌ ଅଛି, ସେଥିରେ ହୀରା ଖଚିତ ହୋଇଛି। ଏସବୁକୁ ଦେଶବାସୀଙ୍କୁ ଦେଖାଇବା ଉଚିତ। ଆମେ ମଧ୍ୟ ସେହି ରାଜମହଲକୁ ଦେଖିବାକୁ ଚାହୁଁ ବୋଲି ସେ କହିଛନ୍ତି। ସେହିଭଳି ଆତିଶୀ କହିଛନ୍ତି, ଭାଜପାକୁ ଲାଗୁଛି ଯେ ସେ ଘର ଛଡ଼ାଇ ନେଇ, ଗାଳିଗୁଲଜ କରି, ମୋ ପରିବାର ବିଷୟରେ ନିମ୍ନସ୍ତରକୁ ଖସିଯାଇ ଆମେ ଦିଲ୍ଲୀବାସୀଙ୍କ ଲାଗି କରିବାକୁ ଥିବା କାର୍ଯ୍ୟକୁ ରୋକିଦେବେ। ଆମେ ଦିଲ୍ଲୀବାସୀଙ୍କ ଲାଗି ଲଗାତାର ଭାବେ କାମ କରିବୁ। ଆବଶ୍ୟକ ପଡ଼ଇଲେ କାହା ଘରେ ଯାଇ ରହିବି କିନ୍ତୁ ଦୁଇଗୁଣା ଆତ୍ମବିଶ୍ୱାସ ସହ କାମ କରିବି ବୋଲି ସେ କହିଛନ୍ତି ।