ବିବାଦ ଘେରରେ ଫସିଲେ ଅଭିନେତ୍ରୀ କିଆରା । ନିଜର ଏକ ଇନ୍ଷ୍ଟାଗ୍ରାମ ପୋଷ୍ଟରେ କୋରିଓଗ୍ରାଫର ଜାନି ମାଷ୍ଟରଙ୍କୁ ପ୍ରଶଂସା କରି ବଲିଉଡ୍ ଅଭିନେତ୍ରୀ କିଆରା ଆଡ଼ଭାନୀ ଅଯଥା ବିବାଦରେ ଛନ୍ଦି ହୋଇଥିଲେ। ତାଙ୍କର ଆଗାମୀ ଚଳଚ୍ଚିତ୍ର ‘ଗେମ୍ ଚେଞ୍ଜର୍’ର ପ୍ରଚାରରେ ବ୍ୟସ୍ତ ଥିବା କିଆରା ତାଙ୍କ ଡ୍ୟାନ୍ସ ରିହର୍ସଲର ଏକ ଭିଡିଓ ସେୟାର କରି ଜାନି ମାଷ୍ଟରଙ୍କୁ କୋରିଓଗ୍ରାଫି ପାଇଁ ଧନ୍ୟବାଦ ଜଣାଇଥିଲେ। ପୂର୍ବରୁ ନାବାଳିକା ଯୌନ ନିର୍ଯାତନା ମାମଲାରେ ଫସିଥିବା ଜାନିଙ୍କୁ ପ୍ରଶଂସା କରିଥିବାରୁ ଲୋକେ ତାଙ୍କୁ ଟ୍ରୋଲ୍ କରିବା ଆରମ୍ଭ କରିଥିଲେ। ଏହାକୁ ଦେଖି କିଆରା ନିଜ ଇନ୍ଷ୍ଟା ପୋଷ୍ଟରୁ ଜାନିଙ୍କ ନାମ ହଟାଇ ଦେଇଛନ୍ତି। ‘ବାହୁବଲୀ’, ‘ସ୍ତ୍ରୀ-୨’ ଓ ‘ପୁଷ୍ପା’ ପରି ବ୍ଲକବଷ୍ଟର ଚଳଚ୍ଚିତ୍ରରେ କୋରିଓଗ୍ରାଫର ଭାବରେ କାର୍ଯ୍ୟ କରିଥିବା ଜାନି ମାଷ୍ଟରଙ୍କ ବିରୋଧରେ ଜଣେ ଯୁବତୀ ଯୌନ ନିର୍ଯାତନା ଆରୋପ ଆଣି ମାମଲା ରୁଜୁ କରିବା ପରେ ତାଙ୍କୁ ଜେଲ୍ ଯିବାକୁ ପଡ଼ିଥିଲା। କିଆରାଙ୍କ ଆଗାମୀ ଫିଲ୍ମ ‘ଗେମ୍ ଚେଞ୍ଜର’ ୨୦୨୫ ଜାନୁଆରି ୧୦ରେ ରିଲିଜ୍ ହେବ। ଏହି ଫିଲ୍ମରେ ସେ ଗ୍ଲୋବାଲ୍ ଷ୍ଟାର ରାମଚରଣଙ୍କ ସହ ନଜର ଆସିବେ।
