ପ୍ରଣବଙ୍କ ସମସ୍ୟା ବଢାଇଲେ ହିମାଂଶୁ !

ଧର୍ମଶାଳା ବିଧାୟକ ହିମାଂଶୁଙ୍କୁ ଆକ୍ରମଣ ଘଟଣାରେ ଧିରେ ଧିରେ ବଢିବାରେ ଲାଗିଛି ରାଜନୀତି । ଏହାରି ଭିତେର ଫସିଛନ୍ତି ଯାଜପୁର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ ଓ ତାଙ୍କ ଭାଇ ଭବ ପ୍ରକାଶ ଦାସ । ବିଜେଡିର ବରିଷ୍ଠ ନେତା ତଥା ଯାଜପୁର ବିଧାନସଭା ନିର୍ବାଚନ ମଣ୍ଡଳୀରୁ ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସଙ୍କ ଭାଇଙ୍କ ନାମରେ ଥାନାରେ ମାମଲା ରୁଜୁ ହୋଇଛି। ବବିଙ୍କ ଭାଇ ଭବ ପ୍ରସାଦ ଦାସଙ୍କ ନାମରେ ଯାଜପୁର ଟାଉନ ଥାନାରେ ମାମଲା ରୁଜୁ ହୋଇଥିବା ଜଣାପଡ଼ିଛି।
ସ୍ଥାନୀୟ ବିରଜା ହାଟ ପ୍ରସଙ୍ଗକୁ ନେଇ ହଙ୍ଗାମା ପରେ ଭବ ପ୍ରସାଦ ଦାସଙ୍କ ନାଁରେ ୪ଟି ପୃଥକ ପୃଥକ ମାମଲା ରୁଜୁ ହୋଇଛି। ରାସ୍ତାରୋକ ସହ ବିରଜା ହାଟରେ ବ୍ୟବସାୟୀଙ୍କୁ ଆକ୍ରମଣ ଅଭିଯୋଗ ଅନୁସାରେ ଏହି ମାମଲା ରୁଜୁ ହୋଇଛି। ଯାଜପୁର ଟାଉନ୍‌ ଥାନା ପୁଲିସ ଭବ ପ୍ରସାଦ ଦାସଙ୍କ ସମେତ ତାଙ୍ଯାକର କିଛି ସହଯୋଗୀଙ୍କ ନାମରେ ମଧ୍ୟ ମାମଲା ରୁଜୁ କରିଛି । ବିରଜା ହାଟରେ ବ୍ୟବସାୟୀଙ୍କୁ ଟଣାଓଟରା ନେଇ ତିନି ଜଣ ବ୍ୟବସାୟୀ ଥାନାରେ ଏତଲା ଦେଇଥିଲେ। ସେହିପରି ବିନା ଅନୁମତିରେ ରାସ୍ତାରୋକ ନେଇ ପୁଲିସ ନିଜ ଆଡୁ ଭବ ପ୍ରସାଦ ଦାସଙ୍କ ନାଁରେ ମାମଲା ରୁଜୁ କରିଥିବା ଜଣାପଡ଼ିଛି।
ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କୁ ବୁଧବାର ସନ୍ଧ୍ୟାରେ ଆକ୍ରମଣ ଘଟଣା ପରେ ବିବାଦୀୟ ହୋଇପଡିଥିଲେ ଭବ ପ୍ରସାଦ ଦାସ। ଏହାପରେ ବିରଜା ହାଟ ପ୍ରସଙ୍ଗରେ ବ୍ୟବସାୟୀଙ୍କୁ ଟଣାଓଟରା କରିଥିବା ଅଭିଯୋଗ ନେଇ ଏବେ ଚାରି ଚାରିଟି ମାମଲା ରୁଜୁ ହୋଇଛି। ବିରଜା ହାଟ ନଖୋଲିବା ପାଇଁ ଗତ ବୁଧବାର ରାତିରେ ବିଜେଡି କର୍ମୀ ଓ ସ୍ଥାନୀୟ ବାସିନ୍ଦା ଆନ୍ଦୋଳନକୁ ଓହ୍ଲାଇଥିଲେ। ସେହିବାଟ ଦେଇ ଧର୍ମଶାଳା ବିଧାୟକ ଶ୍ରୀ ସାହୁ ଯାଉଥିଲେ। ବିଧାୟକ ଆନ୍ଦୋଳନକୁ ନେଇ କିଛି ଟିପ୍ପଣୀ ଦେବା ପରେ ମାରପିଟ ଯାଏଁ କଥା ଯାଇଥିଲା। ଥାନା ଆଗରେ ଉଭୟ ଦଳର କର୍ମୀ ଓ ସମର୍ଥକ ଧାରଣା ଦେଇ କାର୍ଯ୍ୟାନୁଷ୍ଠାନ ଦାବି କରିଥିଲେ। ଗୁରୁବାର ବିରଜା ହାଟ ଖୋଲିଥିଲା ବେଳେ ସମର୍ଥକଙ୍କ ସହ ଭବପ୍ରସାଦ ଦାସ ପହଞ୍ଚି ବ୍ୟବସାୟୀଙ୍କ ସାମଗ୍ରୀକୁ ଫିଙ୍ଗିବା ସହ ଟଣାଓଟରା କରିଥିଲେ ବୋଲି ଅଭିଯୋଗ ହୋଇଛି।