ବର୍ଡର-ଗାଭାସ୍କରରେ ଲଢିବେ କୋହଲି ଓ ସ୍ମିଥ !

ଆସନ୍ତା ୨୨ ନଭେମ୍ୱରରୁ ବର୍ଡର -ଗାଭାସ୍କର ଟ୍ରଫି ଆରମ୍ଭ ହେବାକୁ ଯାଉଛି । ସମ୍ମାନ ପାଇଁ ତଥା ବିଶ୍ୱ ଟେଷ୍ଟ ଚାମ୍ପିୟନସିଫ ଫାଇନାଲ ଖେଳିବା ପାଇଁ ମୁହାଁମୁହିଁ ହେବେ ଟିମ୍ ଇଣ୍ଡିଆ ଓ ଅଷ୍ଟ୍ରେଲିଆ । ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ୱାନ ଉଭୟ କୋହଲି ଓ ସ୍ମିଥଙ୍କୁ ନେଇ ଦେଇଥିବା ବୟାନକୁ ନେଇ ଚର୍ଚ୍ଚା ବଢିଛି । କାରଣ ସେ କହିଛନ୍ତି ଯେ, ବିରାଟ କୋହଲି ଓ ଷ୍ଟିଭ ସ୍ମିଥଙ୍କ ପ୍ରଦର୍ଶନ ହିଁ ବର୍ଡର-ଗାଭାସ୍କର ଟ୍ରଫିରେ ନିର୍ଣ୍ଣାୟକ ହେବ କିଏ ଜିତିବ କିଏ ହାରିବ । କାରଣ ଏ ଦୁହେଁ ହେଉଛନ୍ତି ଆଧୁନିକ ଟେଷ୍ଟ କ୍ରିକେଟର ଦୁଇ ମହାରଥି । ଏମାନେ କେଇ କ୍ଷଣରେ ଗେମକୁ ଚେଞ୍ଜ କରିବାର କ୍ଷମତା ରଖନ୍ତି । ଯାହା ଉଭୟ ଅଷ୍ଟ୍ରେଲିଆ ଓ ଭାରତୀୟ ଦଳକୁ ବିଜୟ ଦେବ । ଏହାବାଦ ଅଷ୍ଟ୍ରେଲୀୟ ବ୍ଯାଟର ଓ ଭାରତୀୟ ବ୍ଯାଟରଙ୍କ ମଧ୍ଯ ମହାମୁକାବିଲା ଦେଖିବାକୁ ମିଳିବ ଏହି ୫ ମ୍ଯାଚ ବିଶିଷ୍ଟ ଟେଷ୍ଟ ସିରିଜରେ । ମାତ୍ର ସବୁଠୁ ରୋଚକ ହେବ ଭାରତୀୟ ରନ ମେସିନ ବିରାଟ କୋହଲି ଓ ଅଷ୍ଟ୍ରେଲୀୟ ବ୍ଯାଟର ଷ୍ଟିଭ ସ୍ମିଥଙ୍କ ଲଢେଇ । ଯାହାର ମଜା ନେବା ପାଇଁ ଅପେକ୍ଷାରତ ଫ୍ଯାନ୍ସ । ଅଷ୍ଟ୍ରେଲିଆ ଭାରତ ବିପକ୍ଷରେ ଟେଷ୍ଟ ସିରିଜ ଜିତିବା ପାଇଁ ଅନେକ ଦିନରୁ ଅପେକ୍ଷା କରି ରହିଛି । ଦଳ ବ୍ଯାକୁଳ ଅଛି ଜିତିବା ପାଇଁ । କାରଣ ଗତ ଏକ ଦଶକରୁ ଅଷ୍ଟ୍ରେଲିଆ ଭାରତ ବିପକ୍ଷରେ ଟେଷ୍ଟ ଶୃଙ୍ଖଳ ଜିତି ପାରି ନାହିଁ ।
କଙ୍ଗାରୁ ଦଳ ଦୁଇ ଦୁଇଟି ବର୍ଡର-ଗାଭାସ୍କର ଟ୍ରଫି ନିଜ ଘରୋଇ ମାଟିରେ ହାରିଛି । ଯାହା ଦଳର ରାଜତ୍ୱ ଉପରେ ମଧ୍ଯ ଶକ୍ତ ଧକ୍କା ଦେଇଛି । ଫଳରେ ବେତାବ ଅଛି ଏହି ବାଦଶାହ ।
ଇତିମଧ୍ଯରେ ଏସିଆର ସର୍ବଶ୍ରେଷ୍ଠ ଦଳ ଟିମ୍ ଇଣ୍ଡିଆ ମଧ୍ଯ ଚାପରେ ରହିଛି । କାରଣ ନ୍ଯୁଜିଲାଣ୍ଡ ବିପକ୍ଷ ଟେଷ୍ଟ ସିରିଜ ହାରିବା ଭାରତ ପାଇଁ କାଳ ସାଜିଛି । ବିଶ୍ୱ ଟେଷ୍ଟ ଚାମ୍ପିୟନସିପ ଫାଇନାଲ ଏବେ ଭାରତ ପାଇଁ ଧୂଳିସାତ ହେବାର ପାଦଦେଶରେ ରହିଛି । ଭାରତ ବିଶ୍ୱ ଟେଷ୍ଟ ଚାମ୍ପିୟନସିପ ଫାଇନାଲ ଖେଳିବାକୁ ହେଲେ ଅଷ୍ଟ୍ରେଲିଆକୁ ଏହି ଶୃଙ୍ଖଳାରେ ୪-୦ ରେ ହରାଇବାକୁ ପଡିବ । ନହେଲେ ଲାଗାତାର ଭାବରେ ତୃତୀୟ ଥର ପାଇଁ ବିଶ୍ୱ ଟେଷ୍ଟ ଚାମ୍ପିୟନସିଫ ଫାଇନାଲ ଖେଳି ପାରିବ ନାହିଁ ଭାରତ । ୱାନଙ୍କ କହିବାନୁସାରେ, ସ୍ମିଥ ତାଙ୍କ ଲୟ ଫେରି ପାଇ ସାରିଛନ୍ତି । ଯାହା ପାକିସ୍ତାନ ବିପକ୍ଷରେ ତାଙ୍କ ଆଖିରୁ ଜଣା ପଡୁଥିଲା ବୋଲି ସେ କହିଛନ୍ତି । ଦୁର୍ଦ୍ଦଶ ଷ୍ଟିଭ ସ୍ମିଥ ମଧ୍ଯ ବର୍ଡର-ଗାଭାସ୍କର ଟ୍ରଫି ଜିତିବା ପାଇଁ ବ୍ଯାକୁଳତାର ସହ ଚାହିଁ ରହିଛନ୍ତି । ସେପଟେ ୱାନ ବିରାଟ କୋହଲିଙ୍କୁ ନେଇ କହିଛନ୍ତି ଯେ, କ୍ରିକେଟର ମହାରଥି ହେଉଛନ୍ତି ସେ । ତାଙ୍କୁ ଅଷ୍ଟ୍ରେଲିଆରେ କ୍ରିକେଟ ଖେଳିବା ପାଇଁ ବେଶ୍ ଭଲ ଲାଗେ । ଫଳରେ ତାଙ୍କର ମନୋବଳ ବଢିବ ଓ ସେ ଫର୍ମ ଫେରି ପାଇବେ
କୋହଲି- ସ୍ମିଥ ଉଭୟେ ୪ ନମ୍ୱରରେ ବ୍ଯାଟିଂ କରନ୍ତି ଓ ତାହାର ମଜା ନିଅନ୍ତି । ଯାହା ତାଙ୍କ ବ୍ଯାଟରୁ ମଧ୍ଯ ଝଲସୁଥିବା ଦେଖିବାକୁ ମିଳେ । ବିରାଟ କୋହଲି ଅଷ୍ଟ୍ରେଲିଆ ବିପକ୍ଷରେ ୨୫ ଟେଷ୍ଟ ମ୍ଯାଚରେ ୪୨୪ ପାଳି ଖେଳି ୪୭.୪୮ ହାରରେ ମୋଟ ୨୦୪୨ ରନ କରିଛନ୍ତି । ଏଥିରେ ୮ ଟି ଶତକ ଓ ୫ ଟି ଅର୍ଦ୍ଦଶତକ ସାମିଲ ରହିଛି । ସଂଯୋଗବଶତଃ ଷ୍ଟିଭ ସ୍ମିଥ ବି ଭାରତ ବିପକ୍ଷରେ କୋହଲିଙ୍କ ସହ ସମାନ ରନ କରିଛନ୍ତି । କିନ୍ତୁ, ତାଙ୍କର ବ୍ଯାଟିଂ ହାର ଅଧିକ । ସେ ୧୯ ଟେଷ୍ଟ ମ୍ଯାଚରେ ୬୫.୮୭ ହାରରେ ଏହି ରନ କରିଛନ୍ତି । ଇଂଲଣ୍ଡର ପୂର୍ବତନ ଅଧିନାୟକଙ୍କ କହିବାନୁସାରେ, ୪ ନମ୍ୱରରେ ବ୍ଯାଟିଂ କରୁଥିବା ଏହି ଦୁଇ ବ୍ଯାଟରଙ୍କ ରନ ହିଁ ଉଭୟ ଦଳ ପାଇଁ ବରଦାନ ସାବ୍ଯସ୍ତ ହେବ । ଯାହାଙ୍କ ବ୍ଯାଟରୁ ଅଧିକ ରନ ଆସିବ, ସେ ଦଳର ପଲା ଭାରି ରହିବା ଥୟ ।